嘔心

今日發生左件事，我覺得嘔心非常，非寫出來不可。

話說20日前，友來了我家作客，所以我們就去買一些點心，買了一包牛肉燒賣同蝦肉燒賣（即係果啲拎去蒸或者叮就食得果啲），因為那個晚上，我地食左Pizza，實在食唔落點心喇！唯有放在雪櫃內，等我遲啲食啦！

如是者，過左20日。

今日早上，打算蒸左啲點心食啦，其實我都有少少諗，會唔會變壞，原因係，我發現那個用左2X年既雪櫃，已經變得唔識凍（不過冰箱就好鬼凍，結晒冰，連開都開唔到）。

好喇！開左包牛肉燒賣，個樣睇黎都ok丫，雖然陣味好似怪怪地，不過可能係雪櫃未姐（無錯，我的確係咁諗），之後就將成盒燒賣拎去個飯煲度蒸啦（無錯，我個飯煲唔係用黎煮飯既，係用黎蒸呢類點心食既，仲有煲水，不過呢個function已經無用喇！）之後我就出返廳用部note book睇劇啦！過左一陣，我一入廚房，個心就一沉，陣味好酸呀！奶嘢啦，早知唔整，浪費我啲時間，仲鬼咁餓架！

點樣，都要拎出黎丟左佢既，就係拎左出黎喇，個look都好似無咩咁架，咁我用對筷子督下佢，一督，溶架，仲要個個都係咁，結果兜嘢比我督左幾嘢之後，溶晒。成兜野好似啲嘔吐物咁，真係好似嘔出黎既嘢，從陣氣味，外表，濃度，都似係人嘔出黎既嘢多過係比人放落口既嘢，嘔心非常．．．．緊係丟都丟唔切啦，仲丟埋另一包添呀！

點解，一個牛肉燒賣，整熟左之後會左一灘嘢架？

不過，果灘嘢既影像一直留在我的腦海當中，正話，我又諗起喇！搞到我好想嘔，我決定寫出黎分享我既感受比大家知。

大家，睇完呢篇文既人，你可以幻想下果灘野係點．．．．唔．．．．．係咪好嘔心呢？